Gal 1 | MHL | STEP | Yo aposel Pol-ke parosifa fain ni Yeesus teeria Galesia-pa ikeman nain nia siisimomiyem. Yo uuwowa aawem fain mua-ke me efa maakemik, ne mua oko-ke me yiemik, weetak. Yeesus Krais-ke yiena Auwa Mua Maneka ikos uuwowa fain yiemi efa sesekamik. Auwa Maneka eena iiriw Yeesus Krais umeya iikirowak nain.

Galatians 1

1 Yo aposel Pol-ke parosifa fain ni Yeesus teeria Galesia-pa ikeman nain nia siisimomiyem. Yo uuwowa aawem fain mua-ke me efa maakemik, ne mua oko-ke me yiemik, weetak. Yeesus Krais-ke yiena Auwa Mua Maneka ikos uuwowa fain yiemi efa sesekamik. Auwa Maneka eena iiriw Yeesus Krais umeya iikirowak nain. 2 Ne yos-ke yena uuwow epaskun fan efamiya ikemik nain unowiya ni feenap nia maakimik, 3 yiena Auwa Maneka ne Yeesus Krais naap wis-ke nia saliwami kema sonom eliwa niuk. 4 I yiena sira samora-pa umowa nain Yeesus Krais-ke epa yiar aawep umok. I miiwa fan sira samora-ke yia wasiep ikua nain yia aawekam naep naap onak, eena yiena Auwa Mua Maneka kookalowa ookami naap onak. 5 Ne naapeya Mua Maneka unuma anane maneka wiar fakeram-ikaiyen. Makena.

Yeesus opor eliwa nain me pauferowa-ke

6 Ni iiriw Mua Maneka-ke Yeesus Krais muuta nain nia kemalep nia fareya ookam-ikeman. Nain aakisa ewur akena piipuami wi eena Yeesus opora wiar kiripami opora oko maimik nain wiokiman. Ni naap oniwkin yo niar soranem. 7 Wi opora nia maakimik nain Yeesus Krais opor eliwa saarik aakunimik, nain wadola-ke. Nain mua oko-ke kema nia mikami Yeesus opor eliwa wiar kiripu naep naap nia maakemik. 8 Yeesus opor eliwa i iiriw nia maakemik, nain aakisa is-keriw opora nain kiripap nia maakiyen-na i umemi mukuna anane ikaiya neek oraiyen. Ne wi ensel pun naap onikuan-na wis pun naap arikuan. 9 Ne yo iiriw opora nia maakem nain aakisa kiiriw nainiw nia maakiyem. Aria iiriw Yeesus opor eliwa nia maakemkun miimap ikeman nain wi mua i opora nain yiar kiripap opora oko nia maakikuan-na mua nain pun ikoka umemi mukuna anane ikaiya neek oraikuan.

10 Ni fain efa kema suuweka. Yo aakisa wi mua-ke efa kookaluk naep uuwiyem-i e Mua Maneka efa urufap efa kookalinok naep uuwiyem? Yo aakisa uuwowa fain mua kookalowa ookekam naep uuwiyem-yon. Weetak, yo mua kookalowa ookami uuwowa fain onekam-na yo Krais uuwow mua me wiar ikekam.

Pol ona uuwowa nain wame maek

11 Naapeya emar unowik, ni feenap amisareka, Yeesus opor eliwa nia maakem-miem nain me mua-pa wiar aawep nia maakem, weetak. 12 Moram opora fain me mua-ke efa maakiwkin maem, ne me mua-ke suule yiiwkin nia maakem, nain pun weetak. Yeesus Krais ona waisow kema yieya nia maakem-miem.

13 Aria yo iiriw yiena Yuuda sira ookam-ikok mua sira kamenap ikem nain meta efar miimaman. Yo iiriw Yeesus teeria wia kemalow marew wia ifakimemi iiwawun wia welawekam naep samor akena wia samoram-ikem. 14 Ne yiena Yuuda sira ookowa nain yos-ke yena arimow epaskun wia nomakep, balisow akena paayarep yiena kae sira kekanowa akena opam-ikem. 15 Aria Mua Maneka eena yena opor eliwa nain wi owow oko oko teeria wia maakem-miawinok naep yo aite uroma-pa wiar ikemkun ona uuwowa nain efa pepekimep-puak nain-ke efa kemalep efa farek. Ona kookalowa-pa ona Muuka yo efarik ariman wuak. Yo mua oko wiamiya aakunep amisa-ko me wiar aawem, weetak. 17 Ne yo Yerusalem-ko ikiwep wi kiikir aposel aremik nain amisa-ko me wiar aawem, nain pun weetak. Yo Arebia kame wiar iwap nan ikem. Nan ikok kiiriw kirep Damaskus ikiwem.

18 Aria nan ikok mokoma arow naap weesereya Pita-ko urufap wameiya aakuninen naep Yerusalem ikiwem. Ne sande erup o wameiya nan ikem. 19 Nain wi aposel papako-ko me wia urufam, weetak. Yeesus wiamun Yems-ke nan ikaeya urufam. 20 Ne yo parosifa fain nia siisimomiyem fain makena, Mua Maneka mokoka-pa me nia peeskimiyem. 21 Ne aria, yo Yerusalem-pa nan ikok Siria ne Silisia kame ikiwem. 22 Ne naapeya wi Yeesus Krais teeria Yuudia kame-pa ikemik nain yo me efa amisaremik. 23 Wi oram meta muutiw feenap efa maiwkin miimam-ikemik, “Mua eena iiriw yia miatinep yia ifakimem-miek, nain aakisa kema kirek. Ne iiriw Yeesus opora porekam naep onak nain aakisa opora nain wia maakem-miawiya,” naap efa maemik. 24 Ne naapeya yo muuta nain Mua Maneka unuma purupemik.